0102ජීවිතය ජය ගැනීමට දැඩි අධිෂ්ඨානයක්, අරමුණක් මෙන්ම දැඩිකැපවීමක් තිබිය යුතු බව රත්නපුර දිස්ත්‍රික් ලේකම් මාලනී ලොකුපෝතාගම මහත්මිය සඳහන් කළාය. ඇය මේ බව සඳහන් කළේ පසු ගිය 06 දා (2020.02.06 දා) ඇහැලියගොඩ අමුපිටිය රස කැවිලි ගම්මානය ජනතා අයිතියට පත්කිරීමේ උළෙල අමතමිනි.
මෙම රස කැවිලි ගම්මානය, රත්නපුර දිස්ත්‍රික් ලේකම් කාර්යාලය, ක්‍රීඩා හා තරුණ කටයුතු අමාත්‍යාංශයේ රත්නපුර දිස්ත්‍රික් කුඩා ව්‍යාපාර සංවර්ධන අංශය සහ ජපන් රාජ්‍ය අනුග්‍රහය සහිතව ජාත්‍යන්තර කම්කරු සංවිධානය ඒකාබද්ධව ඇහැලියගොඩ ප්‍රාදේශීය ලේකම් කොට්ටාසය තුළ පිහිටි අමුපිටිය රසකැවිලි ගම්මානයේ තෝරාගත් ව්‍යවසායිකාවන් තිස්දෙනෙකු සඳහා ඉදිකළ නිෂ්පාදන ගෘහ ව්‍යාපෘතියකි.
මෙහිදී වැඩිදුරටත් අදහස් දැක් වූ දිස්ත්‍රික් ලේකම්තුමිය “ ප්රාථමයෙන්ම මම අද දින වඩාත්ම සතුටට පත්වෙනවා මෙවන් ව්‍යාපෘතියක් රත්නපුර දිස්ත්‍රික්කයට ලැබීම සම්බන්ධව. මේ උතුම් ක්‍රියාවට දායක වූ ඔබ සියලු දෙනාටම මා මේ මොහොතේ ස්තූතිවන්තවනවා. එමෙන්ම රසකැවිලි යනු අප විසින් හරිහැටි හඳුනා නොගත් වැදගත්ම වෙළදපොලක්. අපි අපේ රටේ නිෂ්පාදනය කළ හැකි සෑම දෙයක්ම නිෂ්පාදනය කළ යුතුයි. එතකොට තමයි අපේ රටේ ජාතික ආර්ථිකය ශක්තිමත් වන්නේ ජාතික ආර්ථිකය ශක්තිමත් වීම යනු රටේ පුරවැසියන්ගේ ආර්ථික දියුණුවයි. අද දින මෙලෙස විවෘත කළ අමුපිටිය රසකැවිලි ගම්මානයට යාමට දීර්ඝ ගමනක් තිබෙනවා. එම ගමන කිසිසේත්ම මල් යහනාවන් තුළින් පමණක්ම යාමට ඇති ගමනක් නොවෙයි. මෙම ගමනේ දී ඔබට ගිරි දුර්ඝ, වන දුර්ඝ, කටුකොහොල් මුණ ගැසේවි. දැඩි ලෙස අපහසු මාර්ගයන් පසුකරගෙන ගියවිට ඔබට ඉක්මනින් යා හැකි පහසුවෙන් යා හැකි කාපට් පාරක් මුණගැසේවි. ඔබ ඒ ඉලක්කය සහ තිර අධිඨන සිත්හි තබා ගෙන ඉදිරියටම යන්න. එවිට තව අවුරුදු කිහිපයකින් ඔබගේ ආර්ථිකය ශක්තිමත් වේවි. එමෙන්ම ඔබගේ ඉදිරි පරම්පරාවත් රසකැවිලි නිෂ්පාදනයට සම්බන්ධ කර ගන්න. ඔබෙන් පස්සෙ මෙය මෙතැනින් අවසන් විය යුතු නැහැ.
ඉදිරියට එන සිංහල, දෙමළ අලුත් අවුරුද්ද ඔබට ඉතාම හොදයි. එය ඔබ නිෂ්පාදනය කරන රසකැවිලිවලට හොද වෙළඳපොලක්. අමුපිටිය නම් රස කැවිලි ලෙස ඔබ ඉතා හොද සන්නාමයක් (BRAND) හදාගන්න. එවිට ඔබට මෙම ක්ෂේත්‍රය තුළ දිගු ගමනක් යා හැකියි. අපේ රටේ තිබෙන හෙළ බොජුන්හළ එවැනි සන්නාමයක්. හෙළ බොජුන්හල්වල වැඩකරන පිරිස ඉතාම ආචාරශීලීව පාරිභෝගිකයන්ට ආමන්ත්‍රණය කරනවා. ඒ වගේම ඉතාම ආචාරශීලීව සංග්‍රහ කරනවා. මේ ක්ෂේත්‍රයට එයත් ඉතාම වැදගත්. හෙළ බොජුන්හල් තුළින් බොහෝ පිරිසක් ජීවිතය ජයගෙන තිබෙනවා. ඔබත් මෙම රසකැවිලි ගම්මානය එම තත්ත්වයට රැගෙන එන්න. ඔබට එම හැකියාව තිබෙනවා කියා මම විශ්වාස කරනවා. ඒ සඳහා අවශ්‍ය මඟ පෙන්වීම මේ නිලධාරීන් කරයි. ඔබ අපේ රටේ පමණක් නොවෙයි ජාත්ය්න්තරය තුළටද මෙම රසකැවිලි අලෙවිකරන මට්ටමට පැමිණිය යුතුයි. එය තමයි අපේ බලාපොරොත්තුව.”
මෙම අවස්ථාවට තරුණ කටයුතු රාජ්‍ය අමාත්‍යාංශයේ ලේකම් එම්.ඒ.බී.වී.බන්ඩාරණායක මහතා, සබරගමුව පළාත් ප්‍රධාන ලේකම් ඩී.එම්.මාලනී මහත්මිය, තරුණ කටයුතු රාජ්‍ය අමාත්‍යාංශයේ අතිරේක ලේකම් (තරුණ කටයුතු) සමන් වඩුගේ මහතා, තරුණ කටයුතු රාජ්‍ය අමාත්‍යාංශයේ අතිරේක ලේකම් (සැලසුම්) අනුර රණසිංහ මහතා, කුඩා ව්‍යාපාර සංවර්ධන අංශයේ අධ්‍යක්ෂ සුධීර ජයරත්න මහතා, ජාත්‍යන්තර කම්කරු සංවිධානයේ Chief Technical Advisor (ප්‍රධාන තාක්ෂණික උපදේශක) Dr.Thomas Kring (ආචාර්ය තෝමස් ක්‍රින්ග්) මහතා, දිස්ත්‍රික් අධ්‍යක්ෂ (සැලසුම්) ඩබ්ලිව්.පී. සමන්තිලක මහතා, ඇහැලියගොඩ ප්‍රාදේශීය ලෙකම්තුමා ඇතුළු රාජ්‍ය නිලධාරීන් හා අමුපිටිය රසකැවිලි ගම්මානයේ ව්‍යවසායිකාවන් සහභාගීවූහ.

පුවත් සහ සිදුවීම්